Молитва свт. Николая Сербскаго о спасении православнаго народа нашего от врагов православия

Царю и Господи наш, Иисусе Христе, Боже спасения нашего, милостивно услыши и ныне смиренную молитву нас, недостойных раб Твоих. Согрешихом Ти, прости нам, Господи. Падохом в кал беззакония, очисти ны, Пречистый. Прогневихом Тя, смилуйся, Преблагий. Се преклоняем колена пред Тобою и молим Тя со слезами покаяния: не помяни грех наших и отыми беззакония наша, вонми и услыши вопль грешных чад Твоих. Приими ны под державный покров Свой, о Всесильный, защити Церковь Твою Православную: дерзции бо еретицы, приснии отступницы истины Твоея, составиша ковы и грозно удариша на народ Твой и святыню православную. И паки пролиша кровь чад Твоих, и паки отвориша потоки слезныя верных Твоих, и паки облекоша Церковь Твою в ризу скорби и печали и сплетоша ей тернов венец лжи и насилия и неправд своих. Помози нам, Боже Спасителю наш, славы имени Твоего ради. Аще несмы достойни Твоея помощи, воспомяни отцы наша, присно Ти верно служившыя и за имя Твое и за Крест Твой Честный муки и гонения и смерть претерпевшыя; ихже ради, Господи, простри руку помощи Своея и нам и помилуй нас. Ради праведных отец наших и мучеников за веру правую избави ны постигшия нас напасти. Посрами злоковарныя неприятели народа Твоего, изыми еретики из стада Твоего, вразуми и приведи к покаянию помощников их в земли нашей, освященней Честным Крестом и мученическою кровию. Не попусти гонители наша да ликовствуют, но духом уст Твоих отжени я далече; аще же не раскаются, суди им по вечней правде, Господи и Боже отец наших. Церкви Твоей Святей даруй мир, скорбящым чадам ея возврати радость, братии же нашей, пострадавшей в защите Святыя Православныя Церкве, отверзи врата райския во Царствии Твоем безсмертнем. Да Тя вси мы на земли поем и славим вкупе с Небесною Церквию Твоею, Отца и Сына и Святаго Духа, ныне и присно и во веки веков.
Аминь.